"Lupus est homo homini, non homo, quom qualis sit non novit." (El Llobu ye'l home pal home y non home cuando desconoz quien ye'l otru)

Laksmi Mittal ye un capitalista, namás persigue’l mayor beneficiu al  menor coste. Non solo ye un defensor del sistema, ye’l sistema y pa él les persones como les máquines namás somos elementos pa la producción de riqueza y acumulación de beneficios.

La familia Mittal va algamar, según los medios, polo so 43.02% d’acciones, unos beneficios de 350 millones d’euros brutos, netos si ye que coticen en dalgún llau (Dada la querencia d’esti tipu de personaxes polos paraísos fiscales). Igualmente siguirá siendo un “pastón”. Cantidá a la qu’hai qu’añader el sueldu pola so pertenencia al conseyu o conseyos.

La familia, d’esti mou, ha de mostrase encantada porque’l so paquete accionarial revalorizóse no que va d’añu un 15%. (Dempués d’anunciar la parada del fornu les acciones xubieron un 8%, no qu’ensin dulda constitúi ún de los misterios bursátiles. Cierres y despidos eleven la cotización de les empreses ¿tu entiéndeslo?

L’otru 53% d’accionistes van repartise unos 820 millones d’euros. Ente los accionistes suponemos tarán aquellos y aquelles, trabayadores que con tola so inxenuidá exercen a la vez d’explotadores y explotaos.

La cúpula direutiva, 5 persones, cobren en conxunto 30 millones d’euros añales, a lo qu’hai que de xuru sumar primes por “esto y polo otro”. Ente los que s’atopa’l que los “medios” ¡¡ qué medios !!, dan el sobrenome del “home d’Asturies” na multinacional del aceru D. Gonzalo Urquijo.

Los miembros del Conseyu d’Alministración, 16, ente los que s’atopa’l que llamamos conseyeru “floreru” (los sindicales) cobren cada ún 260.000 euros aproximadamente.

Toos estos y más son los que nos piden responsabilidá mientres lleven seis meses rescindiendo contratos, aterrorizando a los compañeros de les auxiliares, conxelando salarios, parando instalaciones y too ello cola complicidá activa o pasiva del “Generalato” sindical.

Agora la culpa ye del mercáu, del so mercáu, el mercáu qu’ellos defienden, ensin regulaciones, ensin nengún control políticu y eso sí, con munchu dineru público que xenerosamente los Gobiernos de turnu tresvasen al mercáu priváu. Ye por ello, que los Gobiernos s’afayen nuna difícil coyuntura: o besar el culu a D. Mittal o entregar la “pasta”, o quiciás ambes coses.

Mientres D. Mittal xuega cola demanda y la ufierta pa caltener los precios y la tasa de beneficios, al mesmu tiempu promueve un ERE “flexible” (vas al paru, vuelves y produces el pedíu y vuelves al paru) intenta corresponsabilizanos de la crisis a los ciudadan@s porque nun consumimos, nun compramos coches, nun siguimos hipotecándonos hasta les “caches” cola vivienda, nun compramos llavadores, nin neveres y claro asina nun hai manera de que s’estimule la demanda pa que D. Mittal pueda producir y producir y siguir enllenándose los bolsinos que pa eso ye un capitalista.

 Señores, es una crisis del capitalismu y por ello nin las inyecciones de dineru público a los bancos, nin el descensu de los tipos d’interés, nin los planes d’“estimulu” dan resultáu y nun lo dan porque’l modelu de crecimientu basáu n’altes tases de consumu  nun ye sostenible y fairá falta caminar hacia otru sistema, hacia otru modelu, pero esto ye “fariña d’otru costal” y pa ello van necesitase otros políticos, otros partíos, otros sindicatos y probablemente otros ciúdadan@s.