Torna fecha pola Oficina Municipal de la Llingua. Ayto de Xixón

Parroquia asitiada nel Oriente d’Asturies, na metá occidental del Conceyu de Llanes. la llocalidá tien anguaño (agostu 2004) 810 habitantes.
Ta a 8 Km. de la capital del Conceyu y ta asitiada a un altor de 39,5 m. sobro’l nivel de la mar, llatitú 43.4333333 y llonxitú –4,85.
Tien bon accesu pela N-634 que nos dexa visitar llocalidaes como Les Arriondes (onde s’asitia l’Hospital del Oriente, Nava o L’Infiestu) y con muncho meyor accesu (pela autovía) coles llocalidaes más importantes del norte como: Ribesella, Uviéu, Villaviciosa o Xixón hasta l’Oeste y con Torrelavega, Santander o Bilbao haza l’Este (tando por finar el polémicu tramu Unquera-Llanes).
Hai que dicir qu'al traviés de les carreteres del interior pue llegase a la zona de Cuadonga y Picos d’Europa, que ta a más o menos 35 Km.
Na rodiada ta'l monte Llabres de 682 m. onde se faen deportes de riesgu como’l parapente demientres la época del branu.
N’actualidá, Posada, empobinóse haza'l sector servicios, sobre too no que tien que ver cola hostelería y los pequeños comercios que dan vida al llugar. Tamién hai que nomar a les distintes empreses de la zona- carpinteries, talleres, centros educativos, estaciones de serviciu, ganaderíes (cada vegada menos)-, etc. que son fonte de riqueza pa la zona.
Dende 1862, los vienres, celébrase'l Mercáu Selmanal, nel que se puen alcontrar productos de les güertes de la redolada y distintos productos de la zona.
Dempués d’unos meses, nos que’l mercáu se desendolcó nel aparcamientu cercanu a la estación de FEVE, tornó al so llugar d’orixe, na plaza, al finar les obres coles que se remocicó dafechu. En concretu dende’l vienres 2 d’agostu de 2002.
Dende hai dellos años el turismu ye un de los pegollos fonderos pa la economía del conceyu, con bayura d'antigues cases tresformaes pal “Turismu Rural”, asina como pequeñes caseríes, cuadres… tan convertiéndose en llugares ideales pal descansu de families de la gran ciudá na so mayoría de Madrid y del País Vasco.
Tamién pueden atopase nel pueblu, pensiones, hotelinos y pisos en réxime d’alquiler pal branu.
Pola so cercanía a Llanes, l’ambiente de la nueche ta peraseguráu, sobre too nos meses del branu cuando por mor del turismu que cada añu en mayor cuantía va acercándose pel Conceyu se duplica’l númberu d’habitantes.
Son famoses les playes de la zona, perpasando les trenta, les más d’elles d'agües clares, sable fino y llimpio con paraxes naturales d'envidia.

 

La formación d’esti ñuedu urbanu nes tierres de Bricia dióse dempués de la segunda metá del sieglu XIX por mor de que les tierres rurales de la Vega de Santiago Valdellera, s’escoyerán como sé del mercáu selmanal qu’escomencipió a celebrase los vienres. Más tarde convertiéronse na Plaza de Parres Piñera, camudando asina nun espaciu nuevu que de siguida tuvo densificáu, la “Nueva Posada”.
La presión de les entidaes de población que formaben l'antigua parroquia de Posada, el cuayu de los vecinos y el sofitu de los indianos de les socesives xeneraciones complementáronse coles xestiones sofitaes por José Parres Piñera y tamién Posada Herrera.
El mercáu actuó como factor dinamizador qu’obligó primero a facer caleyes alredor del solar que quedó con forma de triangulu. Les caleyes van ser dempués cais, que fueron ocupando cases y tiendes. Llueu la cai camudará en carretera a Robellada y Meré y nes orielles les cases entamarán a baxar hasta la otra carretera, la nueva de Llanes a Ribesella.
El caberu crecimientu de Posada, tamién siguió per estes dos exes qu’anguaño siguen espardiéndose. A lo llargo’l caberu terciu del XIX va faciéndose la configuración d’una entidá urbana dafechu cola instalación d’una botica, oficina de correos y dellos comercios que fueron asitiándose nos años vinientes.
Configúrase primero una zona comercial que se fai más estable cada vegada, y anque’l mercáu taba marcáu pa un día a la selmana, el restu de servicios y transaciones yeren permanentes
La notaría (R.D. 31 d’avientu de 1866), estancu, tiendes d’alimentación, de bebíes, fondes, fornos de pan, zapatería, sastreríes y cerraxeríes fueron arodiando la futura plaza y les cais inmediates que se formaron ente 1870 y 1895.
Por pautu del Ayuntamientu de Llanes aprobóse nel 1862 la creación del mercáu selmanal en Posada celebrándose'l primeru d’ellos el vienres 19 d’avientu d’esi mesmu añu.
Los vecinos de los pueblos qu’integraben el valle (Quintana, Bricia, Turanzas, Piedra y Lledías) llucharen por esti beneficiu amosando tamién les sos dificultaes d’abastecimientu pola distancia que los separtaba de Llanes. Entamaron la construcción de seis barracones, a les sos espenses, p’abellugar a los vendedores.
Escoyóse como llugar del mercáu un sitiu que nun tuviera nenguna tradición, un sitiu nuevu, con una distancia permediada a los cinco pueblos d’enantes y onde fuere fácil pa los vecinos dir colos ganaos y manufacturaos, siendo obligatorio al principiu l’asistencia y compromisu de toos, pa llograr un despegue y fama de mercáu que yera’l pegollu pal ésitu y la continuidá. A esti mesmu sitiu treslladáronse les Feries de Santiago y Santa Llucía dende 1863.
La plaza urbanizóse definitivamente, con un proyeutu de Fermín Coste, nel 1915. Venti años enantes, el 26 de xunetu de 1895 inauguróse nesti llugar el monumentu a Parres Piñera que fue'l primer pasu pa dar una calidá al espaciu. La estatua y el so pedestal costaron más de 15.000 pesetes (90,15 €) y fízola l’asturianu Cipriano Folgueras.