Xulio Berros

CAPÍTULU I

...

L’hermanu pequeñu de Toya trai los güeyos cerraos y pa sorpresa de Toya ¡trai chupu! Toya pasa ganes de quita-ylu y asina poder facer una de les sos famoses prebes de sabor, porque a Toya les coses nueves entren-y pol so tastu, namás adeprendi dempués de saber a qué saben les coses. Pa ella les coses saben a sabor prestoso (ye’l so sabor favoritu, el reserváu a la xente y a los fechos que quier), a sabor gayolero ( un sabor agradable, amañosu pa los collacios, los xuguetes y claro, a eso sabe Mina), a sabor cafiante (ye’l sabor de les coses que la preocupen, como’l colexu, y el maestru), a sabor medrana (ye’l sabor de les coses que-y producen mieu, que son una pila d’elles, porque si hai algo que Toya tien, ye MIEU, a cuasi too) y tamién, como non, sabor a diaños (sabor acutáu pa les coses dafechamente espantibles pa Toya, a eso saben les coses que la fadien, como aquellos que se meten con ella porque ye pequeñuca o los fabricantes de chocolate, una cosa que Toya aborrez permuncho)...