Xulio Berros

"Fuera de xuegu ", ye una hestoria d'amistá ente neños con tresfondu futboleru, "empataos" ye otra visión, menos optimista, ensin dubia del mudiu del futbol d'anguaño. "Empataos" ta enxertao na Antoloxía: "Quintu Aniversariu d'Editora del Norte"

EMPATAOS

Ye la cabera hora la tarde y na sala traumatoloxía del Serviciu Urxencies de Cabueñes, el personal anda tranquilo, nun hai muncha xera. Tán finando d’atender a dos xóvenes que lleven un bon cachu perellí. Lolo llegó nun coche la policía, y a los pocos minutos otru dexó ellí a Sabel.
A Lolo tan rematándo-y la güesera na que va tener que llevar la pierna drecha escondía un par de meses y amás tien un espantible dolor de tiesta. A Sabel cuasi que terminaron yá d’escayola-y los dos brazos y ta fecha una llaceria.
Los dos tienen dieciséis años, y enantes d’aportar a Urxencies nun se conocíen de ná. Agora lleven tola tarde oyendo falar l’ún del otru. Saben pol personal del hospital que los dos llegaron cuasi al empar al hospital, que los dos vienen del mesmu llau, anque entá nun fueron a alcontrase y vese. Quiciavis agora na sala escayoles, seya cuandu más a la par anduvieron, anque una cortina fae llabores de separtación y nun dexa que puean vese les cares.
De sópitu un ruxe ruxe de sirenes averándose al hospital pon n’alerte a la xente d’Urxencies. Tán lo suficientemente avezaos comu pa decatase que la cosa paez seria. Daquien fae un apueste que pon sollerte a tol mundu:
- ... Ye la UVI móvil y polo menos otres tres.
Dalguien fae otra llectura de la tema :
- Vaya colo pocu que mos queda pa colar ...
Un celador da avisu a tol serviciu de “trauma”:
- Dexái lo que tais faciendo, vienen seis presones bastante frayaes, hebio un accidente pergordu d’un autocar na Y...
Ensin terminar de facer l’anuncia entámase un baturiciu fenomenal, camilles a toa velocídá, xente que va xente que vien, glayíos de toa triba y un xaréu ablucante.
Les prioridaes manden y l’únicu llugar que queda en silenciu n’Urxencies ye la Sala Escayoles por muncho qu’ellí tuvieren dos pacientes cuasi iguaos .
D’un llau Lolo cola tiesta a puntu españa-y, y la tibia drecha frayada dafechu. Per otru, Sabel esmolecida pola traza que diba tener con dos brazos en perfechu ángulu rectu, ya inútiles enforma. Y los dos naguando por vese la cara, por saber caún cómu yera l’otru. Conocíen perbién polos comentarios de la xente que fueron cazando demientres los atendíen, que los dos anduvieran na mesma griesca, que les sos families taben fuera esperándolos...
El tiempu pasaba sele, a Lolo debíen de tar faciéndo-y efeutu los calmantes porque taba desapaeciéndo-y el dolor de tiesta. Sabel andaba a la gueta desplicaciones que la dexaran tranquila de cómu se vio metanes una batalla descomanada na qu’un bastiazu piedres, palos, y una multitú finó colos sos güesos en suelu y tamién col so conocimientu, el siguiente recuerdu yá pertenez al historial clínicu que-y abrieron en Cabueñes.
Sabel nun pue aguantase más y entruga:
- ¿Tas entovía perehí?
- ... Onde voi dir con esta pata.
Sabel quixo afondar una migaya más:
- ¿Namás qu’una pierna?
- Nomenon, calla la boca, teo tamién la tiesta en dos cachos, venti puntos creo que me dieron. ¿Y tú?
La voz de Lolo yera granible pa la ocasión, entrecortada, sele y con ciertu tastu resacoso, de xuru que pola concentración de Kalimotxo qu’entá tenía nel sangre.
- Yo amás d’una frayaura xeneral, porque me debieron pasar penriba dos o tres autobuses, teo rotos los dos brazos y debe dar pena veme porque tamién me duel la cabeza un montón, y amás paez ser que me van dexar n’observación dellos díes, porque perdí’l conocimientu demientres un bon cachu ...- retrucó Sabel con dolor nes sos pallabres.
- ¿Y sabes cómu entamó aquello?-
- Si quies que te diga la verdá non, yo diba tan tranquila con tola peña canciando y esbabayando cuandu de sópitu ...
- Yá sé nun me lo recuerdes que me torna’l dolor de tiesta.
Y siguieron falando un bon cachu y atalantaron que los dos llevaben tol día faciendo lo mesmo. Salieren de casa bien ceu, yá pela mañana, magar que fasta les cincu nun entamaba’l “derby”, y pasaran tol tiempu colos collacios preparándose pa la ocasión; bebiendo y faciendo medrar esi odiu irracional que sal de les coraes y que siempre acompaga estos partíos. Lolo yera la primer vegada que vivía intensamente un domingu de derby, Sabel tamién; nengún conocía quién financiaba la folixa pero los llitros de Kalimtxo y cerveza llevaben tol día percorriendo de mano en mano y de baldre, y amás les entraes que teníen pal partíu yeren tamién d’ufierta. Falando d’ello, cola compaña de la cortina separtadora, decatáronse que los dos se vieron enguedeyaos naquel fregáu, y qu’agora amás quedaben les desplicaciones pertinentes a los pas.
Sabel fexo un esfuerciu y algamó a ponese drecha, baxó de la mesa camilla, espurrió los brazos escayolaos y descorrió la cortina, tenía ganes de conocer al mozu col que llevaba un bon cachu charrando y col que paecía compartir destín. Al vese frente a él quedó clisada, lo mesmo que Lolo. Nun supieron qué dicir.
- ... ¿Pero tú?- taramielló Sabel.
- ¿Nun me digas que tú ...?- soltó Lolo
Sabel vio perfechamente que la camiseta de Lolo yera de rayes blanques y coloraes, y él acolumbró con claridá que na cintura de Sabel entá hebía encolingada a mou de cintu una bufanda de color azul.
Sabel echó a rise, y Lolo fexo lo mesmo y espetó-y una entruga
- ¿Sabes cómu quedaríamos?
- Sí, díxomelo enantes una de les méliques, empatamos.
- Diaños entós cómu nos. ¿Nun sedría a unu?
- Pues a lo que paez sí, ¿tien gracia eh?
Al pocu tornó’l personal a ocupase d’ellos y esclariánron-yos que l’accidente la Y yera consecuencia del caberu incidente del partíu.