Xulio Berros

CAPÍTULU 1
PLAN BEDERRE

Comu tolos martes y xueves, Santi apuraba la merenda. Yá taba tocándo-y nel porteru automáticu Chus, y entá teníen de pasar a recoyer a Xamín y Nel. Dempués tocaba garrar el bus, la llinia 25 que resultaba ser la de mayor recorríu de la ciudá y allegase al campu entrenamientu col percuru de nun aportar los últimos, comu de costume.
Santi pegaba'l caberu mordiscu al bocadiellu salchichón, al tiempu que ponía l'anorak y pesllaba la mochila con tolos trebeyos pal entrenamientu: camiseta, pantalón, medies, botes de tacos d'aluminiu, toballa, xabón, peñe, ...
Avezaba a dexar la mochila iguada namás finar de xintar, pues prefería que quedaren enantes otres coses por facer.
Una vegada despidíu de los sos güelos, baxaba les escaleres de tres en tres y nun tris llantábase en portal, onde'l so collaciu menaciaba con nun esperar por él nin una migaya más.
Aquel martes, metanes payares, la tarde yera enforma serondiega. Aparentaba tener pinta de cayer una xelada bien gorda, sicasí ello nun yera torga pa que tuviere llugar el primer entrenamientu la selmana.
Santi, Nel, Xamín y Chus teníen namás en común la so afición pol fútbol, n'otres coses yeren dafechamente estremaos: diben a colexos distintos, vistíen de maneres bien diferentes, a unos prestába-yos un tipu música y a los otros otra. Cuasi no único en que coincidíen yera na edá y no que-yos prestaba'l fútbol. Andaben tol día a la tema, echando "cuadrinos" en parque, falando del partíu del sábadu, de los partíos que daben na tele, camudando cromos de la Lliga, ...