Xulio Berros

CAPÍTULU I

Ye meudía y llueve con toles ganes. Toya sal del colexu. Apaez nel patiu col xubasqueru mariellu d'estrenu abrocháu y col gorru puestu. Güei tamién calza por primer vez unes catiusques azules. Ente tola montonada de xente y paragües llogra atopar a Cuqui. Da-y los dos besos de siempre y empobinen pa casa.

Pa Toya esti día ye perprestosu pues va facer bon usu de la ropa nuevo. Cuqui suéltala de la mano porque Toya enseguidina entama a buscar charcos nos que poner a preba les sos botes. Va con una sorrisa d'oreya a oreya, chiscando ónde alcuentra.
Metanes el camín ente la escuela y la casa, ta'l fornu. Cuqui entra a por un par de cuartos y Toya queda fuera, a la gueta d'una preba definitiva pal so xubasqueru. Entá nun pudo moyalu muncho bien, porque comu llovía hebio que quedar al recréu na clas, pegando glayíos y berríes asgaya. Por fin atopa un canalón con una fuga aparente. Asítiase embaxu y dase una ducha de les que faen época. La xente al pasar al so llau queda clisada.
Toya nota que la calidá del xubasqueru ye valoratible, y tamién que cuandu Cuqui echa una reña ponse abondo gafa. El restu del camín nun queda más remediu que dir de la mano de la muyer cola que se crio tola vida. Dende que Toya ye p'alcordase, siempre tien a la so vera a Cuqui, hasta la hora de la xinta. Los pas de Toya trabayen y por ello al ñacer la neña buscaron a daquién pa que la curiare cuandu ellos trabayaben. Tuvieron muncha suerte con Cuqui, ye perbona pa la rapacina, anque a vegaes consiente más de la cuenta. Toya quierla un montón.
En casa, hasta que da la hora de xintar, Toya entretiénse xugando. Malpenes fae casu pa los sos trebeyos, magar de la cantidá d'ellos que tien, y más agora que tán recientes los Reis. Pa Toya la meyor manera de pasar el tiempu ye allerar de la so "hermanina" Mina. En cuantes camuda les botes poles zapatielles, unes con forma coneyu, mui prestoses pero ná cómodes; empobina pal so cuartu. Ellí ta Mina achucada nel so trubiecu y eso que ye bien tarde. Toya sácala, cámbiala de ropa y xúbela nel carricoche pa da-y un paseín pel pasiellu casa. Mina ye mui especial pa Toya anque nun sepa nin falar, nin rir, nin andar.
Cuandu sal al pasiellu emburriando'l carricoche con Mina, ve comu na cocina ta Cuqui iguando los aperios de planchar. Toya ponse contenta porque Mina cuasi nun tien ropa llimpio, echáralo a llavar cuasi too'l día pasáu.