Xulio Berros

CAPÍTULU I
LA MAYESTRA NUEVA

Toya acaba d’entamar el tercer cursu de primaria. Otra vuelta al colexu, anque pa ella esti aconteciminentu ye de lo más prestoso.
L’alcuentru cola xente a la que nun vio demientres el branu ye daqué polo que nagua al final de les vacaciones, anque tamién l’entamu la escuela trai pa ella coses que nun-y presten nada.
Por culpa de la so poca estatura los mayestros tienen la costume d’asitiala siempre nuna mesa na primera filera, fechu que la cafia abondo y que fai que tolos cursos al salir del colexu’l primer día, siempre diga a los sos pas que los mayestros tienen con ella una zuna especial.
Esti cursu tien una mayestra que ye nueva nel colexu. Nómase Carme.
Nel xaréu que se forma nel colexu’l primer día del cursu ente les fileres de neños y neñes, salió de dientru del edificiu escolar y dirixióse dafechu pa los neños y neñes de Terceru B, el cursu de Toya.
Los neños llevaron una bona sorpresa, pues camentaben que como cada dos años, el tutor de Terceru B sedría Velino, ensin dubia’l mayestru más prestosu del colexu. Toya quedó varada al vela cola llista na mano, canciando al altu la lleva los nomes de la reciella de Terceru B y empobinándolos pa dientru clase. Nun pudo resistise y cuando sintió como la nueva mayestra l’apellidaba, decidió nun quedase cola dulda y entrugó-y:
- ¿Ónde ta Velino?
- Pasa pa dientro- ésa foi la única rempuesta que consiguió de la nueva mayestra.
Mal entamu, camentó Toya.
Al entrar na so nueva clase, la mayestra foi asitiándo a los neños al so criteriu, acordies con un dibuxu que trayía na mano, con unos cuadrinos nos que dientru taben los nomes de la xente del grupu.
A Toya, como de costume, tocó-y un sitiu en primera llinia, xusto delantre de la mesa de la mayestra, anque ella yá lo esperaba. Cerca d’ella taben dalgunos de los sos meyores collacios, a la mandrecha Iván, qu’a xulgar de Toya, venía bastante sosegáu por primera vegada dende qu’ella lu conocía, aguantóse y na filera nun emburrió a nadie. A la manzorga, taba Amed, que por más que fuera bien altu, tampoco nun se llibraba de tar siempre al cabu la mesa los profesores. Y xusto nel sitiu que taba tres d’ella, na so filera, pues esi sitiu taba vacíu…