cuspir poemes nun platu:
eso ye lo que quiero facer
vivir describiéndolo too
nos papeles cínicos d’un llibru
ye l’únicu xeitu de creyese
porque la tinta endolca les verdaes
a les fueyes muertes de los árboles muertos
qu’un día mos vieren pasar pel monte
qu’agora ye un residencial pa xente bien

-meyor que nós-

con suelu de parqué, bien amueblao,
vidru doble pal fríu que nun fai,
ascensor, corredor perguapu,
plaza de garax, trés baños.

hai díes (hailos)
que paso enteros
dándo-y al [control-alt
-suprimir] dos vueltes,
reaniciándome d’ocho a ocho
ensin topar formatu afayadizu
procesu activu, archivu,
nin siquieramente’l [reset].
hai díes (hailos daveres)
que marcho pa la cama
ensin saber si daquién tien culpa d’ello:

- esti tecláu mudu del que tento d’esmucir
- igual yo

- o simplemente, bill gates.

lo único que queda son los andenes,
la carril triyada y los xefes d'estación,
el soníu de les puertes cuando tranquen.
la rutina de distancies conocíes,
les maletes urxentes
y esa estratexa brutal:
la condena de los quilómetros lentos.
tolo demás xira, cambia,
embúrrianos a treslallende,
empobina’l futuru hasta l’esiliu.

matinal
 
moyábemos galletes nos almuerzos
y la prensa nun dicía nada nuevo:
güeyu por güeyu, diente por diente
díbemos quedando ciegos
mellaos de pallabres
corríennos anfileres peles venes
osidábase’l sangre
 
inundábense de sable les verdaes
acababa la tinta de les rotatives
engurriábense les llingües apenaes
mordíense la boca unes vecines 
ensuchaba la ropa nos tendales.

oxalá enxamás ye l’argumentu

“oxalá” enxamás ye l’argumentu
si na to casa sigue habitando’l fríu,
xira les exes, ximielga la estructura,
nun comas más cruasanes rancios,
bárri-y el xelu al to pechu. tira la basura.