1. n’el topu fartón.

nes fiestes de san mateo del añu pasáu, el topu fartón salió a la cai como fai tolos meses de setiembre. xunta, xega y cosal saquen alantre’l so chigre de solidariedá. maría, una amiga mía, tuvo trabayando ellí. tres de la barra, yá se sabe, camisetes, adhesivos, bébores n’abondo, y tamién delles coses pa comer.

los pinchos son protagonistes davezu, sobre too depués de la media nueche, cuando apierta la fame. hailos de tortiella, quesu, xamón…
- un bocadillo de esos, moza, dixeron dende fuera.
- ¿de los de llombu?, entrugó maría.

el rapaz rompió en carcaxaes que retumbeyaben na plaza de riego.
- h.a, h.a, h.a… ría al altu la lleva.
- “de llombu”, h.a, h.a, h.a, “de llombu”… repetía alloriáu ensin parar.

paez ser que maría quedó mirando pa elli ensin saber mui bien que-y dicir mentanto too al so alredor siguía al ritmu habitual. a la fin, púnxo-y el pinchu de llombu y quedó pensando si aquelles risotaes yeren les d’un ignorante, un simpáticu ensin gracia, o la voz brutal d’un pueblu que-y da la espalda al so ser, representada nun home, que de folixa, garrare una mamada cruel ensin sabelo.

2. ún de degaña.

l. ye una bona alumna, dalgo charrana, pero más nada. hai dos selmanes al rematar la clas d’educación físico, dexamos unos minutinos pa relaxar. a una d’eses, l. averóse a min pa dicime daqué que me chocó.
- profe, ¿cuánto se tarda en llegar a degaña?
- lo menos 2 hores, díxi-y.

quixi saber un poco más del tema:
- ¿qué perdisti ellí?, ne. ¿tienes un mozucu?
- bueno, sí, un amiguín.
- vaya bien, ¿non?
- sí, pero lo malo es que habla bable, profe. no me mola nada eso del bable, es de garrulos. dicen “¡ho!”, “ye” y cosas de esas. reprodució la moza desaxerando les prototípiques modulaciones de los xateros, un suponer.

l. tien 15 años y si naide ye a remedialo, crecerá pensando qu’eso que se fala nos pueblos ye dalgo llonxano, feo, poco prestoso y colo que nun s’identifica. yo xugué a mete-y el mieu en cuerpu diciendo que yo yera “del bable” y qu’eso que dixere yera mui ofensivo y diba costa-y caro na evaluación. lóxicamente, nun foi más qu’una broma y ella súpolo. l. cumple los requisitos pa superar la mio materia. ¿quién que-y importe más que’l profesor en práctiques de “gimnasia” sedrá a desplica-y aquello que falen en degaña? camiéntome que naide. murnia realidá.