|
La de Meinhoff nun ye una hestoria’l usu nos grupos rock, el so esistir comu banda podría dicise que ye’l resume y produtu del trescurrir
xeneracional de milenta d’habitantes d’esta península fuerciaos al trasiegu que ye’l dir y tornar pente l’atlánticu; el so resultáu ye la
xunión de fuercia y creatividá d’ambes les dos fasteres d’una mesma familia, los que colaron y los que quedaron…
A entamos del ’99, adientru una rexón au reina la incertidume y el desamparu económicu, cuatro mozos tomen el determín de fundar la
banda sonora qu’amuese lo qu’al so alrodiu y nes sos vides acontez, el resultáu d’otra miente nun podría ser: Duro.
Ritmos ablucantes, voces glayantes y violencia guitarrera pueblen caún de los once temes qu’encadarmen “Sacudiendo el corazón”,
debut discográficu que, comu’l so nome amuesa, enrifa a cualaquier triba menos a la pasividá. Con unes lletres unes vegaes
direutes, otres intimistes, y les más de les vegaes críptiques que gueten identificase col oyente direutamente. Descúbrese
asina un grupu de metal d’anguañu, bracu, pero nel que nun fai falta arrascar abondo pa descubrir les influyencies d’aquelles
seminales bandes qu’inventaron una nueva mena d’atalantar la música acuyá pelos ’70…
Anguañu la intención d’estos cuatro músicos ye l’asoleyar en direutu la so música perdayuri nel Estáu. Esi ye’l so puntu fuerte;
u lliberen la so roxura acumulada. Asina que si ves los dos cuélebres al dévalu pela to llocalidá, acude a la so llamada; nun
t’arrepentirás.
| 
