Xulio Arbesu

(L’Entregu, Samartín del Rei Aurelio, 1957). Ganador del Concursu de Llectures pa Rapazos de l’Academia de la Llingua Asturiana cola novela xuvenil Misión Pelayo (Academia de la Llingua, 2002), del premiu de novela Llorienzu Novo Mier con Un raposu en Tresmonte (Academia de la Llingua, 2003), y del Xosefa Xovellanos nos años 2002 y 2006 coles obres Potestas (vtp, 2003) y El pisu d’enriba (KRK, 2007), suyu ye tamién el llibru de rellatos Cuentos con neños (Ediciones Trabe, 2005).

 

vANESSA GUTIÉRREZ

(Urbiés,1980). Más conocida pola so obra poética, nel añu 2006 estrenóse con ésitu como narradora col llibru Les palabres que te mando (Ámbitu). Tien asoleyao los poemarios Onde seca l'agua (2003) y La danza de la yedra (2004) col que ganara'l premiu Teodoro Cuesta. Ye fundadora de la revista Reciella Mallory y redactora del selmanariu Les Noticies. Recientemente publicó’l llibru El país del silenciu (Ámbitu, 2007) xunto cola periodista Beatriz R. Viado.

 

XOSÉ Mª RODRÍGUEZ

(Bimeda, Cangas del Narcea, 1956). Autor perconocíu y collaborador habitual del diariu La Nueva España, a pesar de nun vivir n’Asturies la so rellación col país y la llingua asturiana rescampla dende los primeros años del Surdimientu, al traviés de la so vinculación col Conceyu Asturies de Madrid. Tien publicao Nueite de filandón: Cuentus na nuesa tsingua (1982), Xuan Canas, nial d’alcurdanzas (1983), la novela Tiempos de nublina (Ediciones Trabe, 2004) y el relatu Amores ya desencantos (Conseyu de Comunidaes Asturianes, 2006).

 

MIGUEL ROJO

(Zarracín, Tinéu, 1957). Ye ún de los nomes imprescindibles de la lliteratura asturiana, tanto en prosa como en versu. En 1988 algamó’l Premiu Xosefa Xovellanos de novela con Asina somos Nós, y en 1992 el Premiu de Narraciones Trabe cola novela Histories d’un seductor (Memories d’un babayu), una de les obres más esitoses de la nuesa narrativa. Ye autor de les colecciones de relatos curtios Tienes una tristura nos güeyos que me fai mal (Llibros del Pexe, 1989), Historias del más acá (Ediciones Trabe, 1999) y Cuentos pa un turista blancu (Ámbitu, 2006). La so obra poética apaez recoyida nel volume Territorios (Llibros del Pexe, 2007). Tien dellos llibros pa nenos: Telva y los osos (Ediciones Trabe, 1994), Telva y el fueu (Ediciones Trabe, 1998) y Raitán el petirrojo (Editorial Everest, 2003).

 

XUAN BELLO

(Paniceiros, Tinéu, 1965). Probablemente l’escritor en llingua asturiana más conocíu fuera d’Asturies, la obra que-y dio mayor sonadía ye Hestoria universal de Paniceiros (Ámbitu, 2004; Premiu de la Crítica d’Asturies), traducida con gran ésitu al castellanu. La so obra poética abarca títulos como Llibru de les cenices (Alvízoras Llibros, 1988), El llibru vieyu (Ediciones Trabe, 1994; Premiu Teodoro Cuesta) o Los caminos secretos (Ediciones Trabe, 1996; Premiu Xuan Mª Acebal). Ente la so obra narrativa destaquen títulos como Pantasmes, mundos, laberintos (vtp, 1996), La cueva del olvidu (Ámbitu, 2006) y Al dios del llugar (Ámbitu, 2007).

 

Pablo X. Suarez

Pablo X. Suárez. Nació en Samartín d’Anes (Siero) en 1981. Ye autor del poemariu Asturiana Beat (2005) y d’un bon garrapiellu de cuentos ganadores de dellos premios y asoleyaos en diverses revistes.

RAMÓN LLUIS BANDE

(Xixón, 1972). Narrador, dramaturgu y cineasta, ye un referente nel mundu audiovisual asturianu al traviés de trabayos como la esitosa serie de televisión Camín de cantares y llargometraxes como El fulgor (2002), Divina lluz (2003) o La carta de Bárbara (2007). Ente la so obra narrativa destaquen Verdá o consecuencia (vtp, 1997), De la vida de les piedres (vtp, 1999), Habitaciones vacies (Ámbitu, 2002) y La muerte de los árboles (Ámbitu, 2006).

 

FRANCISCO ÁLVAREZ

(Xixón, 1970). Periodista de profesión, ye redactor del diariu xixonés El Comercio. Nel añu 1998 revelóse como una de les voces más interesantes de la lliteratura asturiana col llibru de relatos En poques pallabres (Ediciones Trabe). Tamién ye autor de Patiu de prisión (vtp, 1998), colección d’artículos sobre la so esperiencia na cárcel de Villabona, onde cumplió condena por declarase insumisu al serviciu militar obligatoriu, y del estudiu Dixebra: Cróniques d’un pueblu (L’Aguañaz, 2003).

 

PABLO TEXÓN

(Felechosa, Ayer, 1977). Ye ún de los autores mozos con mayor reconocencia nel panorama lliterariu asturianu. Suyu ye’l poemariu Toles siendes (Ediciones Trabe, 2005; Premiu Nené Losada Rico), y el volume de narrativa Catedral (Ámbitu, 2006). Col poemariu La culpa y la lluz ganó’l Premiu Teodoro Cuesta.  Como traductor, encargóse de l'adaptación de Xulia de Strindberg (Ámbitu, 2006), que foi representada pola compañía de teatru Margen.

 

ADOLFO CAMILO DÍAZ

(Caborana, Ayer, 1963). Narrador, ensayista, dramaturgu, músicu... posee una de les voces más orixinales del panorama lliterariu asturianu. Nel añu 1985 ganó’l premiu Xosefa Xovellanos cola novela Añada pa un güeyu muertu, esperimentó cola novela negra en Miénteme, dime la verdá (Azucel, 1989) y la novela xuvenil con Blugás (Ediciones Trabe, 1993). Diariu de viaxe (Conseyería de Cultura, 1996) y Imago (KRK, 2007) son les otres dos noveles del autor premiaes col Xosefa Xovellanos nos años 1995 y 2006. Suyes son tamién les obres de teatru  Psicokiller (1993) y País. Una traxicomedia asturiana (2004); esta última tien el premiu de Testos teatrales Alejandro Casona 2005.

 

SERGIO GUTIÉRREZ CAMBLOR

( 1985). Poeta tien publicaos dellos poemes na revista  Formientu  y el poemariu “A dixo a B: perversu", (Ediciones Trabe, 2007). Tamién foi ganador del premiu de poesía Elvira Castañón nel 2007
Y ye ùn de los responsables de la creación del alcuentru lliterariu "Entamada07", nel conceyu de Siero. Esta ye la so primera incursión na narrativa

 

NACIU VARILLAS

(Xixón,1975). Periodista de profesión, irrumpió con fuercia nel mundu lliterariu asturianu cola novela Carretera ensin barru (Ediciones Trabe, 2005) que foi Premiu de la Crítica d’Asturies. El camín de Dios (Ámbitu, 2007) ye la nueva novela d’esti autor.

 

iris díaz trancho

(Xixón, 1981). Una de les nueves voces de la narrativa asturiana. Especializada en lliteratura infantil, con “La caxa de cristal” ganó’l Concursu de Llectures pa Rapazos de l’Academia de la Llingua en 2004. Llogrótamién el primer premiu del Concursu de Cuentos Curtios de la Tertulia Cultural ‘El Garrapiellu’ en 2005 cola obra ‘Sedna’.  Suya ye la novela La neña de les trences al revés (Ediciones Trabe, 2006).

 

CARLOS SUARI

(La Xungarosa, Avilés, 1982). Poeta, tien publicáu’l poemariu Treslallende (Ediciones Trabe, 2007) xunto col tamién poeta corverán Berto García. Foi autor del primer poemariu n’asturianu en copyleft, El mio cachu tírolu. Nesta antoloxía estrénase como narrador

XANDRU FERNÁNDEZ

(Turón ,1970). Narrador y poeta, tamién ye conocíu por ser el lletrista del grupu de rock Dixebra y pola so columna nel selmanariu Les Notices. Entre les sos obres narratives destaquen: Los homes de bronce (Ediciones Trabe, 2001), Les ruines (Ediciones Trabe, 2004; Premiu de la Crítica d’Asturies 2005),  La banda sonora del paraísu (Premiu de Narraciones Trabe, 2006), xunto con El club de los inocentes (Premiu Xosefa Xovellanos,1993) y El suañu de los páxaros de sable (Premiu Xosefa Xovellanos, 1999). Ye tamién autor de la obra poética Lletra muerto (Ediciones Trabe, 1998) y Servidume (Ediciones Trabe, 2001; Premiu Xuan Mª Acebal).