Pablo Rodríguez Medina

Pablo Rodríguez Medina. Nació en San Andrés de Llinares (Samartín del Rei Aurelio) en 1978. Foi Premiu Xosefa Xovellanos de novela en 2001, Premiu Asturies Xoven de testos teatrales en 2003 y ganador del premiu de narrativa Conceyu de Llangréu en 2004, por citar namás qu’unos pocos galardones de los munchos que tien llograo tanto n’asturianu como en castellanu. Ente les sos obres destaquen los llibros de cuentos Los paraísos perdíos (2000) y Nun blinquen ayalgues (2003), les noveles L’arna de San Atanás (2002) y Los taraos (2004) y los poemarios Tiempu d’esiliu y povisa ayeno (2001) y El color de l’ausencia (2004).

Quique Faes

Quique Faes. Nació en Xixón en 1975. Periodista de formación, debutó en 1998 cola novela Memoria, a la que siguieron Malena fecha de sol y de fresa (2000) y L’agobiante imperfección de les coses (2004). El so últimu llibru publicáu hasta la fecha ye la colección de cuentos Asuntos menores (o non) (2007). Actualmente vive en Madrid.

Penelope Miranda

Penélope Miranda. Nació n’Uviéu en 1977. Na actualidá dirixe’l Serviciu de Normalización Llingüística de L.lena. El so cuentu “L’arume la to ausencia” publicóse na revista Entellunu nel añu 2000.

Pablo texón

Pablo Texón Castañón. Nació en Felechosa (Ayer) en 1977. Debutó en 2005 col poemariu Toles siendes, col qu’algamara’l Premiu Nené Losada Rico. En 2006 publicó’l llibru de cuentos Catedral y ganó’l Premiu Teodoro Cuesta con La culpa y la lluz.

Naciu Varillas

Naciu Varillas. Nació en Xixón en 1975. Ye periodista de profesión y autor de la novela Carretera ensin barru (2005), que recibió’l Premiu de la Crítica d’Asturies a la meyor novela del añu. Ganador de dellos premios de narraciones, en 2007 publicó la novela curtia El camín de Dios.

Pablo X. Suarez

Pablo X. Suárez. Nació en Samartín d’Anes (Siero) en 1981. Ye autor del poemariu Asturiana Beat (2005) y d’un bon garrapiellu de cuentos ganadores de dellos premios y asoleyaos en diverses revistes.

Nicolas V. Bardio

Nicolás V. Bardio. Nació n’Uviéu en 1987. Estudiante de Ciencies Polítiques, tien dellos cuentos asoleyaos en revistes lliteraries. En feches próximes va ver la lluz la so primer novela, Sol reló. Anguaño vive en Madrid.

Hector Perez Iglesias

Héctor Pérez Iglesias. Nació n’Arlós (Llanera) en 1978. Ye autor del poemariu Prisión de náufragu (2006), amás de ganador del Premiu Nené Losada Rico en 2006 con L’amarga cazumbre y del Premiu Asturies Xoven de poesía (en castellanu) cola obra Las tardes baldías (2003).

Xurde Fernandez

Xurde Fernández. Nació en Candás (Carreño) en 1975. Profesor de llingua asturiana n’enseñanza secundaria y collaborador de l’Academia de la Llingua Asturiana y del diariu El Comercio, vio publicada en 2007 la so primer colección de cuentos curtios, titulada Volver.

Carlos Pitcairn

Carlos Pitcairn. Nació n’Uviéu en 1976. Profesor d’inglés n’enseñanza secundaria, ye ganador de los premios El Garrapiellu y Art Nalón de relatos y del Elvira Castañón de poesía. Vive actualmente en Santander.

Henrique G. Facuriella

Henrique G. Facuriella. Nació en Blimea en 1980. Codirixe la revista lliteraria Reciella Malory. Publicó en 2006 la novela curtia Los fieles de Maalena.

Ezequiel Cala

Ezequiel Cala. Nació en Xixón en 1976. Tien publicao en La Nueva España, Les Noticies y El Canciu’l Cuélebre. Ganó en dos ocasiones el Concursu de Rellatos n’Asturianu de Cangas del Narcea. Na actualidá vive en Madrid.

Vanessa Gutierrez

Vanessa Gutiérrez. Nació n’Urbiés (Mieres) en 1980. Redactora del selmanariu Les Noticies y codirectora de la revista lliteraria Reciella Malory, publicó los poemarios Onde seca l’agua (2003) y La danza de la yedra (2004), ganador esti últimu del Premiu Teodoro Cuesta. Ye autora tamién de la novela curtia Les palabres que te mando (2006).

Pablo Rodríguez Alonso

Pablo Rodríguez Alonso. Nació en Xixón en 1979. Historiador de formación, tien llograo bien de distinciones nel campu del ensayu, amás de ganar los premios de relatos El Garrapiellu y Los Bilordios de Pinón. Ye autor del poemariu La lluz del nordés (2006), col qu’algamó’l Premiu Teodoro Cuesta.