© Suburbia Ediciones S. L. c/Duque de Rivas, 1, 1º D.
Xixón (33204)
Tel 653908623
Con una ayuda de la Conseyería de Cultura, Comunicación Social y Turismu del Principáu d'Asturies
Contactu
suburbiaediciones@hotmail.com
Mio ma, la pirata
Iris Díaz Trancho
Suburbia Ediciones, Xixón, 2010
36 páxines
PVP:12 € (IVA incluyíu)
Ilustraciones de Gloria Caamaño
L’oficiu de pirata yá nun ye lo que yera. Barba Negra lleva un restaurante, Barba Roxa fízose xastre y un grupu de pirates africanos punxo una cooperativa d’agricultura. Cola ayuda d’un sestante y una perra llamada Pulga, mio ma y yo diremos tres el rastru d’una llave qu’abre un tesoru escondíu na islla de Madagascar. Un viaxe que va cambiar, pa siempre, les nuestres vides de pirates
El cantu'l gallu
Xosé Mª Rodríguez de Bimeda
Suburbia Ediciones, Xixón, 2009
220 páxines
PVP:10.40 € (IVA incluyíu)
EL CANTU'L GALLU, ye la obra qu'inagura la colección d'ensayu Páxina en blanco. EL CANTU'L GALLU de Xosé Mª Rodríguez ye una recopilación d'artículos apaecíos nel diariu La Nueva España, nel que l'autor fai un repasu de la realidá asturiana.
"El títulu escoyíu pa esti llibru, El cantu’l gallu, ye tamién el de la columna periodística de Xosé María Rodríguez de Bimeda pa la so sección en La Nueva Quintana, suplementu del diariu La Nueva España dedicáu a la cultura d’Asturies. Recueye la idea qu’orientó al autor cuando escribió estes collaboraciones: igual que’l gallu nos despierta al alborecer, la columna intenta despertar la conciencia del llector, creando un estáu d’opinión a traviés de les sos idees más personales, derivaes d’un analís críticu y d’una toma de posiciones clara énte la realidá del país." Carlos Cuellas
CÁCABOS D'ADOQUÍN
Iván Cuevas
Suburbia Ediciones, Xixón, 2009
64 páxines
PVP: 6 € (IVA incluyíu)
(Adoquín: Escelente pieza pa la construcción de barricaes. Eduardo Haro Tecglen.)
Estrena poética del autor xixonés Iván Cuevas, Cácabos d’adoquín ye poesía urbano, reflexón a pie de cai sobre’l poder de la poesía, sobre les lluches y los enfotos nos que’l poema s’implica y sobre les zunes y los ídolos de barru llevantaos pola sociedá post-industrial. En cierta midida, Cácabos d’adoquín tien muncho de recapitulación sobre’l valor de cada pallabra nel nuevu mileniu.
En pallabres del historiador Rafael Rodríguez Valdés, autor del prólogu del llibru, lo guapo d’esta obra ye “cómo l’autor recupera los axentes colectivos como materia poético; agora que yá nun se respira’l fumu de les manifestaciones, presta afayase ente pallabres onde vive y se tresmite’l sentir de lo colectivo al encruz d’una voz personal que contién y sostién la fuerza de les que nun se dieron”.
el poema molesta
aparez
nos momentos más inoportunos
recuerda una palabra anecdótica que duel
un espertar
un besu
y marcha lluego
dexándonos cola soledá de los cuerpos
desnudos
lA pONTE Y OTROS CUENTOS
Miguel Rojo
Suburbia Ediciones, Xixón, 2009
178 páxines
PVP: 10.40 € (IVA incluyíu)
Antoloxía de relatos del escritor Miguel Rojo (Zarracín, Tinéu, 1957), un nome esencial de la lliteratura asturiana del Surdimientu. Nesti volume recuéyense los sos cuentos más conocíos, revisaos y correxíos pol autor a costafecha pa esta edición hasta'l puntu de que munchos d'ellos tán cásique re-escritos. Xunto a estos, recupérense dalgunos relatos difíciles d'atopar actualmente y dellos cuentos inéditos. Un llibru imprescindible pa comprender y esfrutar la obra d'un autor orixinal y sorprendente. Prólogu d'Antón García.
les siete novies del rei
Xulio Arbesú
Suburbia Ediciones, Xixón, 2009
88 páxines
PVP: 8 € (IVA incluyíu)
El rei va casase, el problema ye que-yos prometió matrimoniu a siete moces, agora les afortunaes (?) tienen que pasar por diverses pruebes pa saber quien ye la elexida. Xulio Arbesú (Potestas, El pisu d'enriba) demuestra que, a veces, la meyor manera de conocer el presente ye rise del pasáu. En pallabres del propiu autor: (...) equí me teníes a mi, que soi de los de tarariar l’himnu de Riego tolos catorce d’abril, escribiendo una obra monárquica dedicada a aquel rei asturianu que, según remotes cróniques, vivió nel valle del Nalón, y valió pa da-y apellíu al conceyu de San Martín. Con un protagonismu tan femenín y numberosu, nun podía asemeyase muncho a La venganza de don Mendo. Hubi de renunciar a tan prestosu modelu, pero vive Dios que nun contaba renunciar a tres coses: Que la obra diba ser cómica, y escrita en versu, y con una escena a base de pallabres esdrúxules (...)
Xulio Arbesú
Volta de Paso
Arturo Álvarez Fernández
Suburbia Ediciones, Xixón, 2009
60 páxines
PVP: 6 € (IVA incluyíu)
Suburbia Ediciones edita Volta de Paso, el primer poemariu editáu n'eonaviego de la editorial. L'autor, Arturo Álvarez Fernández, más conocíu como "Tangueiro" foi'l ganador del I Certamen de Poesía na Fala "Aria" col poemario Pedras Moles, tien tamién delles poemes incluyíos nes antoloxíes Unde letras falan y Na boca de todos.
(...) Que naide se chegue a este libro
en busca de recursos chamadeiros, de
metáforas axustadas, de comparacióis desavezadas ou d’imaxes curiosas. Arturo busca, a espresión directa y el ritmo interno y, a decir verdá, algunos poemas son unauténtico xogo rítmico (...)
JOSÉ ANTONIO FERNÁNDEZ VIOR
LENDO A VIDA
De pequeno quixera
ter aprendido a ler
en libros acabaos de fer
por sabios vivos,
por sabios veyos,
qu’a os domingos vistan
el traxe de gala d’os quincayeiros.
Libros que m’expliquen cómo
nel camín recto á comodidá,
tan incómodo me sinto.
Libros nos qu’entendas
que ser parte del rabaño
namás ye quita a fame
a quen vive vexetando.
asturies cuenta... (y naide nun escucha)
VV.AA.
Edición y prólogu de Silvia Cosio
Suburbia Ediciones, Xixón, 2008
216 páxines
PVP: 10,40 € (IVA incluyíu)
El llibru ta compuestu por quince relatos de diferentes autores onde caún d’ellos da una visión d’Asturies. Estructuráu en tres partes (el pasáu, el presente y el futuru), nél participen escritores asturianos de les tres promociones del Surdimientu, entamando con un prólogu de Silvia Cosio, ...Y naide nun escucha. Les obres y autores presentes na antoloxía son:
...El Pasáu
“Pelegrín por cuenta ayena” de Xulio Arbesú, “Una pota d’arroz” de Vanessa Gutiérrez, “L’acabóse” de Xosé Mª Rodríguez de Bimeda, “La vuelta a casa” de Miguel Rojo, “Fragmentos d’unes memories d'Andrés Parrondo” de Xuan Bello.
...El Presente
“Flash” de Pablo X. Suárez, “La vida nueva” de Ramón Lluís Bande, “Alonsomanía” de Francisco Álvarez, “Uviéu, 10:30” de Pablo Texón, “Sara” d'Adolfo Camilo Díaz, “Boa rápida” de Sergio Gutiérrez Camblor, “Esto ye Asturies” de Naciu Varillas.
...El Futuru
“Bloque dos, cuarta zona, espaciu alministrativu primeru. Asturies” d'Iris Díaz Trancho, “Les Mandes” de Carlos Suari, “Otra vez U.H.P.” de Xandru Fernández.
LA ESPERA
Xurde Fernández
Suburbia Ediciones, Xixón, 2008
204 páxines
PVP: 10,40 € (IVA incluyíu)
Primer novela en solitariu del autor candasín Xurde Fernández.
La Espera ye una novela sobre la soledá y tamién sobre'l difícil tránsitu entre la mocedá y la vida adulta.
«… igual qu’un animal s’arrastra hasta la escuridá
pa morrer, imaxino qu’un home va hacia la lluz.
Quier morrer en casa y la escuridá nunca ye la nuesa
casa».
GRAHAM GREENE.
Pues ver la participación del autor en Pieces pinchando equí: http://es.youtube.com/watch?v=03zyvnWznu
ENTIERROS DE XENTE FAMOSO
Xandru Fernández
Suburbia Ediciones, Xixón, 2008
212 páxines
PVP: 10,40 € (IVA incluyíu)
Sorprendente llibru de relatos del autor turonés Xandru Fernández
Entierros de xente famoso escuende cuentos que falen de la muerte, del azar y de los estraños caminos polos que deambula la vida.
"...Asina quixera yo que fuera esti llibru, y asina —
más o menos— cada cuentu d’esti llibru. Un cuadriláteru
de piel de yak capaz de contener el destín d’un imperiu..."
elcombate melancólicu
Ignaciu Llope
Suburbia Ediciones, Xixón, 2009
60 páxines
PVP: 6 € (IVA incluyíu)
Suburbia Ediciones edita El combate melancólicu, l’esperáu llibru de poemes de Ignaciu Llope dempués de diez años de silenciu editorial.
Comprometíu ya irreverente, Ignaciu Llope explora en El combate melancólicu los mitos y les zunes, los suaños y les frustraciones de toa una xeneración. Nos sos versos, herederos cuando de la poesía vanguardista d’entreguerres, cuando de la llírica tradicional del Arcu Atlánticu, pero recorríos por una personalidá inconfundible, danse cita figures y fechos hestóricos (Andreu Nin, Ulrike Meinhof, la revolución irlandesa...) coles esperiencies privaes, glayaes en público, d’un militante de lo contemporáneo.
Cabe’l silenciu nesta nueche
cuando na celda permanez
el pasu amodo del olvidu
y seique unos animales
buin xuguetones y perezosos
allalantrones de la piedra duro
de les muries, del alambre
nos que termina’l presente.
Fragmentu de CARTES D’UNA PRESA DE LA ROTE ARMEE FRAKTION NA GALERÍA DE LA MUERTE (ULRIKE MEINHOF).
les vides incompletes
Xandru Fernández
Suburbia Ediciones, Xixón, 2009
64 páxines
PVP: 9 € (IVA incluyíu)
Poemariu ganador del Premiu Xuan María Acebal 2008, ye'l regresu pela puerta grande de Xandru Fernández a la poesía.
Poemariu ganador del Premiu Xuan María Acebal 2008, ye'l regresu pela puerta grande de Xandru Fernández a la poesía.
Les vides incompletes pretende ser un recuentu d’esperiencies significatives, munches d’elles truncaes pola muerte o la edá, al tiempu qu’un catálogu irónicu d’opiniones intempestives. Baxo l’advocación de Pasolini y Auden, la poesía dialoga equí con temes prosaicos, d’a diario (la monarquía, la memoria histórica), ensin perder por ello l’aspiración de perdurar.
MORAL PROVISIONAL
Cada vez que me pongo a escribir llevo conmigo
dos sieglos (polo menos) de ficciones calculaes
qu’a cuasi toos nos paecieron (yá non) verdaes a medies
o cásique absolutes, cuando yéremos más nuevos y inocentes.
El ritmu, la prosodia, les metáfores grises qu’utilizo
como cuerpos estraños que de mi s’alimenten,
royéndome lo poco que de mi caltuvieren
dacuando les pallabres: hipoteques que vencen
namás qu’un par de güeyos, o ún namás, s’apoderen
de la so condición de falsedaes inconscientes,
de febles ruindaes
que siempre van conmigo.
Orbayu d'alfileres
Carlos Suari
Suburbia Ediciones, Xixón, 2009
100 páxines
PVP: 8 € (IVA incluyíu)
Suburbia Ediciones edita Orbayu d’alfileres, primer llibru en solitariu de Carlos Suari.
Desprexuiciada y directa, la poesía de Carlos Suari cala nos misterios de la cotidianidá a la busca d’un sentíu fragmentariu de la existencia: el parte meteorolóxicu, el mobiliariu urbanu o les rimes radiaes de la cultura pop, valen-y al autor, ente munchos otros signos, de puntu de partida pa trazar una cartografía de los desamparos y los afanes del ser humanu modernu.
Orbayu d’alfileres culmina y clausura’l ciclu poéticu que l’autor entamó en Treslallende, escritu xunto col tamién poeta Berto García.
Carlos Suari (Avilés 1982), ye tamién l’autor del primer poemariu asturianu en Copyleft, El mio cachu tírolu.
L’ECO (PSICOFONÍES DE MIN MESMU)
Namás soi eso, l’eco del eco, eco,
d’una palabra dicha sele a la oreya de
[naide.
Eco, eco brutal que rebota muerto… eso:
psicofoníes de min mesmu.
VÍa de serviciu.
Muestra de nueva narrativa
VV.AA.
Suburbia Ediciones, Xixón, 2007
132 páxines
PVP: 11,60 € (IVA incluyíu)
Ver galería de semeyes de los y les autores
Vía de serviciu ye una recopilación de catorce relatos que naz cola intención de demostrar y confirmar la buena forma y calidá de la lliteratura n’asturianu. Esta esbilla pretende ser una muestra “canónica” de la narrativa de la tercer xeneración del “Surdimientu”. Axunta voces yá consagraes, como ye'l casu de Quique Faes, Vanessa Gutiérrez, Pablo Texón Castañón o Naciu Varillas, xunto con autores más nuevos, como pueden ser Ezequiel Cala, Nicolás V. Bardio o Xurde Fernández, y cuentos yá premiaos xunto con relatos hasta agora inéditos.
Con esti títulu inaugúrase la colección de narrativa “mecánica popular”.
...De lo fantástico a lo hiperrealista, del campu a la ciudá, de lo amable a lo decididamente grotesco, tolos estilos y temes tienen cabida nesti garrapiellu de relatos que representen a la promoción más nueva d’escritores asturianos...
(Del Prólogu de José Luis Piquero)
PerrerÍes
Pablo Rodríguez Medina
Suburbia Ediciones, Xixón, 2007
124 páxines
PVP: 10,40 € (IVA incluyíu)
Llibru que recopila por primer vegada nueve de los más premiaos cuentos de Pablo Rodríguez Medina correxíos y prologaos pol propiu autor. Los relatos abarquen un amplíu campu temáticu, desde la fantasía sucia de Perreríes hasta'l puru costumbrismu en cuentos como El Plan (Friends forever).
En pallabres del propiu autor:
"Quien llea esti volume decataráse de que de fondu tolos cuentos tienen una mesma actitú: la de que’l llabor d’escritor sigue siendo, n’esencia, dar testimoniu de sigo y d’una época –bona o mala–, la que mos toca en suerte vivir. Y facelo de la manera más guapa posible: y non siempre lo guapo ye lo bucólico".
Anuariu de la Xunta Asesora de Toponimia 2006
Fernando Álvarez-Balbuena García, Ramón d'Andrés Díaz, Xulio Viejo Fernández
Suburbia Ediciones, Xixón, 2007
264 páxines
PVP: 18 € (IVA incluyíu)
Esti llibru recueye'l llabor de recopilación de la toponimia tradicional y el decretu de la so oficialización, amás d'un estudiu percompletu de les distintes formes y variantes de cada nome de llugar. El volume recueye los trabayos de la Xunta Asesora de Toponimia nel añu 2006, con tola información actualizao referente a los conceyos de Nava, Xixón, La Ribera y Colunga.