aMERICAN pIE

José Luis Piquero

¿Cuenta Asturies? Si miramos pal escenariu políticu, paez ser que nun contamos muncho. Si acaso, na estaya cultural podemos permitinos ser un pocoñín más optimistes. Pero pa pescanciar el sentíu d'esa pregunta inicial y de les sos posibles respuestes diba haber que remontase al pasáu, facer historia y recuentu; diba haber qu'esaminar con güeyos nuevos la realidá presente y pue qu'hubiera que proyectar hacia'l futuru les nueses espectatives. D'eso trata precisamente esta antoloxía, "Asturies Cuenta...", que lleva l'elocuente subtítulu de "...Y naide nun escucha". Dicir, y dicir pa que los escuchen, ye lo qu'intenten los quince autores incluíos, pertenecientes a les últimes promociones de la lliterartura asturiana.

A cáun d'ellos planteáron-yos los editores un retu: escribir un relatu que punxera de manifiestu dalguna realidá significativa de lo que foi, ye y pue ser Asturies, nel pasáu, nel presente o nel futuru. El resultáu son quince escelentes relatos de fechures y temes mui estremaos pero con dalgo en común: toos traten d'esti país y toos se comprometen en desvelalu en dalguna faceta.

Asina, Xulio Arbesú remóntase la dómina de los pelegrinos medievales metanto Vanessa Gutiérrez retrocede un poco más cerca: a los años de la posguerra y los fugaos, del mieu y la violencia. De la vuelta a casa traten Miguel Rojo y Ramón Lluis Bande: regresos imposibles cuando yá nun sabemos cuála ye la nuesa casa. A veces ye una Asturies culta y más o menos próspera la que val d'escenariu, como nos testos de Xuan Bello, Francisco Álvarez o Pablo Texón, anque acabe por asomar la cabeza una realidá menos próspera y más fea. Los qu'escribeb del futuru (Iris Díaz Trancho, Carlos Suari y Xandru Fernández) imaxinen l'acabación d'Asturies d'una manera o otra. Pa Fernández, esta patria querida acaba siendo una velea: un parque temáticu con traces de campu de concentración. Adolfo Camilo Díaz, Sergio Gutierrez Camblor, Xosé María Rodriguez, Pablo X. Suárez y Naciu Varillas completen la nómina d'un llibru importante y revelador: un retrato d'un país que, como diz Silvia Cosio nel prólogu, abúltanos les más de les veces a los mesmos asturianos un país estranxeru.

Les Noticies, 12 d'Ochobre de 2008, añu XIII, nº 605.

Publicaciones Ámbitu S.L.