TE RECUERDO, AMANDA

José Luis Piquero

La cubierta d’El combate melancólicu, d’Ignaciu Llope (Cuideiru, 1961) nun pasa desaparcibida: la foz y el martiellu del distintivu del Partíu Comunista d’América. Pasando les páxines atopamos un poema sobre’l revolucionariu catalán Andreu Nin, otru sobre l’activista de la Fracción del Exércitu Roxu Ulrike Meinhof, otros dos sobre combatientes irlandeses abatíos pol exércitu inglés y ún más sobre la madre d’unos fugaos de la Guerra Civil. Nesti llibru fálase de consignes, de panfletos, de banderes, d’acción revolucionaria

¿Un regresu a la poesía social, urxente, d’otros tiempos? En gran parte sí pero dende otra perspectiva. Atención al títulu: el combate d’estos versos ye’l de la melancolía. Equí nun s’apela a la llucha y a la rebelión, nun se denuncien inxusticies ni se critica al poder: equí fálase de la derrota. Mainhof, Nin y los demás foron notorios perdeores na llucha revolucionaria y Llope retrátalos con esi halu de fermosura romántica que tien siempre el perdeor. Polo demás, nestos poemes abonden los paisaxes silenciosos empañaos pol orbayu, les cases abandonaes, les eríes cubiertes d’artos, la soledá, el vientu que barre la memoria... Precisamente “La mala memoria” se titula ún de los testos. Fala de cuando “les coses yeren / cencielles, blanques, duces” y la esperanza enllenaba “los requexos de la vida” y sonaben les voces de “los compañeros / diciendo, conxugando, trazando / el vierbu ingriente de la revuelta”. Too ello piérdese na alcordanza y nel tiempu, convirtiéndose en “años varaos en nenyures”. Los versos finales de “Ánima mundi” vienen de perles pal casu: “Y yá esos que lluchanon / volven a mirar tres de sigo / la llinia melancólica del combate”.
Podemos añedir que munchos d’estos poemes tienen ritmu, rima y aire de balada, de canción popular (dalgún foi musicáu y hasta s’inclúi la partitura). Too esto llévanos a pensar na canción d’autor de los años 60 y 70: los Autes y Víctor Manueles y Víctor Jaras más melancólicos. Non “A desalambrar” sinón “Te recuerdo, Amanda” o “El viejo Coronel”. Hasta se cita a ún d’esos cantautores, el portugués Xosé Afonso.
Inaciu Llope canta nesti llibru la señaldá de la revolución perdida como otros canten los amores d’adolescencia. Nesti sen, y si quixéramos facer la llectura política que ta pidiendo a gritos, El combate melancólicu ye un llibru “desmovilizaor”. Pero igual acertamos más diciendo que se trata de poesía elexíaca tiñida de colorao que nos meyores momentos llogra emocionar.

Les Noticies.

Publicaciones Ámbitu S.L. 8 de Marzu de 2009- AÑU XIII- Nº 626