el efecto doppler

Miguel Rojo

L'efecto Doppler esplica por qué los cuerpos sonoros que s'arimen a nos, fainlo con un soníu muncho más agudu que cuando s'alloñen. Reconozo qu'entamar una crítica lliteraria con una llei física pue paecer la babaya pretensión de ser orixinal por parte del qu'ecribe esto o, lo que sería menos malo, nun saber cómo da-y principiu al artículu.

Pues bien, nin lo primero nin lo segundo. Esplícome: na páxina 166 del llibru de relatos de Xandru Fernández (Turón, 1970) "Entierros de xente famoso", vien escrito "mientres que sentía'l bocinazu de la furgoneta pasando xunto a min, tresformáu nun quexíu cuasi fúnefre por aciu del efecto Doppler". esta curiosa comparanza (y digo curiosa porque paez que la xente de "lletres" tien bula pa nun tener N.P.I. sobre temes científicos, coso que nun ocurre al revés) dióme pie a pensar que, d'alguna manera, los relatos del turonés encaxaben a la perfección no que s'entiende por efecto Dopller: sentímoslos llegar estruendosamente mientres los lleemos, a mancanos con ellos pol vacíu esistencial al que nos emburrien, pa llueu, cuando piesllamos el llibru, según van allonxándose na distancia del tiempu, seguir sintiendo'l ruíu de les sos palabres na cabeza, más grave " por aciu del efecto Doppler", eso sí, pero con una cafiante y testerona persistencia.

Los diez cuentos- más un prólogu del autor que nun tien desperdiciu y que inclui otres dos pequeñes histories-conformen un mundu tan pieslláu y uniforme que resulta sobrante la necesidá de pone-y un títulu tan feu, "Entierros de xente famoso"-paez una sección de bilordios del Hola!-, col fin de xustificar una unidá de la que va sobráu tol llibru.

Porque ye verdá que nos cuentos hai dalgún qu'otru entierru... o paecío. Pero eso nun ye má qu'una anécdota. El valir del llibru, la so xustificación como pa recomendalu fondamente ensin mieu a enquivocase, asienta en que siendo relatos estremaos ente sí ánxeles celestiales en combate, ruinos axustes de cuentes, pareyes con afición a les mascotes, un rocambolescu non entierru del cantante Gram Parsons...), en toos ellos atopmos el méritu d'afondar nos reistros más insignificantes de la realidá, seique lo anecdótico de la vida humana, p'aventánoslo a cara perru y que nun seyamos a miranos nel espeyu ensin venos reflexáu nalguno de los personaxes del llibru, nalgún de los sos xentos...Aquello de que l'infiernu ta na mirada del otru.

Los llibros de Xandru Fernández son necesariamente realistes, a la manera que lo yeren los de Kafka o Chejov, y con estos "Entierros de xente famoso" tien el descaru de paseanos pola cuenca minera o pol desiertu del Joshua Tree en California pa recordanos que la condición humana, nunos personaxes que se saben responsables únicos de la so esintencia, nun cambia nin cola lonxitú nin cola llatitú dientru d'esta civilización postindustrial o postmoderna o postloquequiera... onde hai muncho de rendición.

Un llibru, si me dexáis dicir, caverianu, onettianu, camusianu, cheeverianu... pero sobre too, xandrianu n'estáu puru. Un llibru nun apto pa deprimíos pesar de le frebes d'humor-negru, por supuesto- que lleva enteveráu...

Un llibru que, como dalgunos otros, pasará inadvertíu pala mayoría por llevar el pecáu orixinal de tar escritu n'asturianu.

Ellos lo pierden.

El Comercio, 24 de Febreru 2009, añu XXXI, nº 10623.

Vocento.