A DOS METROS EMBAXO TIERRA

José Luis Piquero

Los diez relatos que componen l’últimu llibru de Xandru Fernández tienen una cosa en común: en toos sal un entierru, anque nun siempre seya de dalguién famosu. Polo demás hay equí cuentos xocosos y cuentos dramáticos, cuentos realistes y cuentos con tresfondu fantásticu, mui bonos cuentos y dalgún cuentu regular.
Xocosa ye la peripecia del matrimoniu qu’adopta un suricatu en “Historia natural”, y tamién resulta xocosa, polo rocambolesca, l’aventura (real) del secuestru del calabre del cantante Gram Parsons en “Caballos selvaxes, ánxeles cayíos”. Dramáticu, y muncho, ye’l descensu a los infiernos del protagonista de “Los supervivientes” o’l final de “El diablu nel corredor”. En cambiu, “Señales del cielu”, “La radio interior” o “El país que se paecía al Oeste” son más bien cuentos tristes, sórdidos, desesperanzaos, fechos de ínfimos drames cotidianos.
Xandru Fernández consigue los sos meyores relatos precisamente cuando nun saca de quiciu la realidá, cuando nun la fuercia en busca d’un argumentu impactante. Los personaxes de “Señales del cielu” y “El país que se paecía al Oeste” son xente común a la que podemos atopar en cualquier chigre; xente a la que nun-y pasa nada extraordinario. Y nesos relatos tampoco pasa cásique nada pero l’autor acierta a espeyar nellos un cachu del sinsentíu de la vida. “Balada del falsu DJ” o “Historia natural” abulten imperfectos porque’l so tonu esperpénticu nun compensa la perda de verosimilitú. Estrañamente, la última pieza del llibru, “La revuelta de los pastores de yaks”, tamién tien muncho d’esperpentu y, sicasí, funciona gracies a la perspectiva narrativa y al ominosu final. Queda pendiente decidir si’l cuentu que da títulu al volume diba ganar o non con un desenllaz más abiertu.
Acásu la mayor oxeción que se-y pue poner a Xandru Fernández (por otru llau, un narrador más que solvente) ye l’afición a contalo too, a nun dexar nada nel aire y dar esplicaciones pordemás. Tamién, a veces, el gustu por pintar muncho la escena, multiplicando detalles innecesarios (como’l color de cada prenda, los rasgos físicos, etc.).
Pero vamos quedar colo qu’importa. Xunto a varios relatos fallíos o simplemente correctos, en Entierros de xente famoso hai cinco realmente escelentes, dignos de figurar na más esixente antoloxía. La mitá del llibru: más de lo que puen dicir munchos.

Les Noticies.

Publicaciones Ámbitu S.L.