© Suburbia Ediciones S. L. c/Duque de Rivas, 1, 1º D.
Xixón (33204)
Con una ayuda de la
Conseyería de Cultura, Comunicación Social y Turismu del Principáu d'Asturies
Contactu
suburbiaediciones@hotmail.com
David Fernández
Mundiu de llocos
Güei toi too aturdío. Va munchu tiempu que nun taba asina, que nun tenía una sensación tan rara. Nun sé por qué me llevanté con calor, muncho calor, pero tamién tiritando de fríu. Esto nun me da buenes sensaciones, asina que voi almorzar y dir a ver al mio collaciu Yuang Lee que yera un bon mélicu.
Asina foi, almorcé y colé pa la consulta’l mélicu. Mientres diba pela cai paecía que la xente me miraba, que m’echaben una güeyada d’arriba a abaxo. Cuanto más me miraben, sentía más fuerte aquella sensación que me diera al llevantame. Y cuento más medraba esa sensación, más nerviosu me ponía y intentaba tapame cola ropa pa que nun me miraren, pero más me miraben. Asina qu’entame a correr pa la consulta.
Namái llegar el mélicu entrugóme que por qué llevaba la ropa tapándome la cara. Coles mesmes díxe-y que tenía una sensación rara, que la xente nun me paraba de mirar. Después de cunta-y esto mandóme que-y enseñara la cara pa ver si podía facer daqué.
De primeres punxi delles torgues pero a la fin quité la ropa. El mio collaciu, el mélicu, quedó ablucáu, casi nun-y salía denguna pallabra. Averose y anque-y entrugué que qué tenía, siguió ensin falar, mirándome y mirándome.
Dempués d’un bon ratu, cerca les dos hores d’inspeición, diome’l diagnósticu y díxome que podía tornar otra vuelta pa casa, que si quería que nun me volviera a tapar, que de xuru que la xente yá nun me diba mirar.
Asina que, a cara descubierta, escomencé’l camín pa casa pergayoleru, ensin mieu de dengún tipu. Nun sé si la xente me miraba o facía la vista gorda, pero yo diba cola tiesta bien alta, encantáu dempués de lo que me dixera’l mélicu. Pase’l parque y naide me miró. Llueu pol centru de compres y tampoco. Hasta per delantre’l campu fútbol onde diba entamar el Sporting-Uviéu con xente abondo pa velo.
La preba de fueu foi ver que la portera nun me dixo nin un res y foi como si la sensación que tuviere enantes d’almorzar s’esfumare, marchare pa nunca más volver.
Asina yera too hasta que, xusto enantes de xubir pal ascensor, sentí un xuxuriu na escalera. Asoméme y vi a dos muyeres que nun me quitaben güeyu y que falaben pelo baxo, colo que la sensación que marchare enantes tornó otra vegada al mio cuerpu a la velocidá de la lluz. Tire p’arriba pa mio casa enfurrucáu.
Y agora equí toi, mirándome al espeyu y entrugándome por qué una persona como yo, con pelo en pechu, los pies y les manes grandes, con rabu y cuernos y una sensación de calor que nun marcha, porque, ye más, toi tiritando, nun tien sitiu nun mundiu de llocos como esti. Y pa encima al Bush entovía lu aceuten.