© Suburbia Ediciones S. L. c/Duque de Rivas, 1, 1º D.
Xixón (33204)
Con una ayuda de la
Conseyería de Cultura, Comunicación Social y Turismu del Principáu d'Asturies
Contactu
suburbiaediciones@hotmail.com
Pablo X. Suárez
Fragmentu digresivu de “Del chicle al cristal”
Durante tola mio infancia hubo, non sé esactamente si sólo una o varies empreses qu’aprovecharon el tirón de les series televisives de moda pa vender chicles. L’Equipu A forma parte, xunto con Mc Gyver y el Coche Fantásticu, de la triloxía de series americanes que de verdá nos ficieron flipar a los neños de los ochenta. Series violentes, nes que nunca nun morrió nadie nin hubo sangre, porque los héroes teníen la rara cualidá de dexar a los sos enemigos llimpiamente inconscientes con un par de puñetazos. Había tiros, tamien, davezu, que tampoco nun algamaron a malu nin buenu nengún, si bien ye verdá qu’arreventaben ventanes y llevantaben ñubes de povisa naquellos polvorientos suelos del mediu oeste que valíen d’escenariu. Yeren, en definitiva, ficciones basaes na violencia nes que nunca nun apaecía una violencia real, o una violencia coles consecuencies qu’esta lleva arreyaes, consecuencies que Tarantino y cierta parte del cine de los noventa s’encargaríen d’amosanos a les clares depués, afalándonos pa interiorizar la nuestra incipiente perversidá. Una de les actividaes favorites del patiu del colexu yera precisamente la de “xugar al Equipu A”, na que caún garraba ún de los personaxes y interpretábalu corriendo d’un llau a otru, asonsañando misiones. Mientres que los papeles d’Hannibal, el xefe, M.A, el fuerte, y incluso Murdock, el llocu, taben polo xeneral bien consideraos, el qu’unos años más tarde toos llegaríamos a aceptar consensuadamente como más afayadizu, el de Fenix, el follador, nun nos llamaba daquella gran cosa l’atención. Naquel día de seronda de principios de los ochenta, yera la cara mala hostia de M.A la que facía d’imán pal mio deu índiz, nel que Josefina nun tardó n’arreparar. Tampoco nun yera dificil, pa un neñu de la mio edá, saca-y lo que fuera a una tendera vieya y aburrida como Josefina.