© Suburbia Ediciones S. L. c/Duque de Rivas, 1, 1º D.
Xixón (33204)
Con una ayuda de la
Conseyería de Cultura, Comunicación Social y Turismu del Principáu d'Asturies
Contactu
suburbiaediciones@hotmail.com
Sergio Gutiérrez Camblor
FELICES FIESTES
La moza cola que salía dexóme va ya casi dos meses.
Esta selmana alcordéme de les nueses coses más de lo normal. Creo que’l dolor de barriga tien tamién que ver con too esto.
Como tengo tiempu y perres
torné a les nueches colos amigos y a meteme caña puntualmente.
Tamién esfruto de navidiegues tardes de relax.
Como xinto sobres esquisites,
pigazo casi una hora y tovía con ardor espierto,
siéntome y póngome a baxar y consumir bon porno amateur
–de baldre, too material d’Europa l’Este– creo que toi echando ñalgues de flan. Hasta me pinguen les tetes.
Esti 25 llégame un mensaxe felicitándome les fiestes y deseándome tolo meyor. Ensin nengún fin razonable y que nun contesto nin contestaré.
Lo que faigo ye zotame cuerpu a tierra nel suelu la salita
–a un cote sobre min xiblen les bales–
y fartúcome planches hasta notame duru y más sexy.
Porque nun toi llibre d’un alcuentru casual.
Porque nun s’hai qu’abandonar. Porque soi un sentimental afogáu pol sistema.
Y porque los zamarros que se tiren a les polaques
nun tienen pinta d’echar siestes goches y podrecer colos vaqueros desabrochaos delantre l’ordenador.