© Suburbia Ediciones S. L. c/Duque de Rivas, 1, 1º D.
Xixón (33204)
Con una ayuda de la
Conseyería de Cultura, Comunicación Social y Turismu del Principáu d'Asturies
Contactu
suburbiaediciones@hotmail.com
Xurde Fernández
Últimes palabres
L’escritor siempre dixera que se diba retirar el día que cumpliera sesenta años. Nin una palabra más, nin un artículu periodísticu más, nin un llibru más…
L’escritor recordaba (quiciabes con dalgo d’espantu y señaldá) aquelles palabres qu’entamaben el so primer cuentu (asoleyáu nuna revista universitaria que nun llegó al segundu númberu):
«Caminábemos ensin conocer el nuesu destín».
Tamién recordaba les últimes del llibru qu’asoleya güei domingu, día del so sesenta cumpleaños, nuna de les más importantes editoriales del estáu:
«Dormiré ensin alcordances de futuru».
L’escritor de sesenta años garró tolos títulos qu’él escribiera (más d’una ventena, allugaos por añu d’edición nuna estantería de la sala) y quemólos nun borrón que fizo na llosa.
Nes áscuares quemó’l restu de llibros que tenía nunes estanteríes del cuartu ordenaos por orde alfabéticu (d’Atxaga a Marías, y de McCoy a Vargas Llosa).
Toles palabres volviéronse ceniza.
L’escritor metiólo nunos barcales de plásticu y foi espardiéndolo, adulces, pelos praos y ribes qu’arrodiaben la so casa y que protagonizaren la so lliteratura.
Sintióse bien…
L’aire caliente de la seronda golpiába-y la cara mientres subía la cuesta de vuelta pa casa.
Baxó les persianes, metióse na cama, tapóse coles sábanes y esperó que les palabres lu escaecieren pa siempre.