© Suburbia Ediciones S. L. c/Duque de Rivas, 1, 1º D.
Xixón (33204)
Con una ayuda de la
Conseyería de Cultura, Comunicación Social y Turismu del Principáu d'Asturies
Contactu
suburbiaediciones@hotmail.com
Xurde Fernández
Nun ye exactamente asina
Pa ti por siguir creyendo nos suaños.
Pa ti por facer qu’esista la realidá.
Yera la primer vegada qu’Antón pisaba aquella pista de baille.
Ana, pela cueta, pisábala toles nueches de marzu a setiembre. Yera, cuasi, el so únicu divertimentu; quiciabes, tamién, la so única xera (pa la qu’entamaba a preparase, siempre, depués de facer la única comida del día).
Antón agarrárase a aquelles vacaciones de seis díes como la igua de tolos males que lu tresformaren dafechu en menos de cuatro meses; del tou a la nada.
De los tiempos vieyos recordaba la compañía de muyeres guapes y homes poderosos, la ropa de les meyores marques, el caminar per sales vip d’aeropuertos de tol mundu, les nueches eternes enllenes de droga de primera en reservaos de discoteques... Y depués de too aquello namás-y quedaba dineru pa pagar aquellos seis díes al sol d’una islla: durmiendo nun cuartín d’hotel con vistes a una piscina col agua enllén de fueyes y insectos flotantes.
Quiciabes diben ser les vacaciones más tristes de la so vida, pero creyía nelles como la única esperanza d’atopar un cambiu. Pal futuru nun quería atender («el tiempu dirá» pensara de la qu’encargara les vacaciones dos díes enantes, de la que salía pela puerta de casa con tolo que tenía na maleta).
Anque namás llegar al aeropuertu Antón pensó naquello que fuera un día, naquello que siempre quixera ser. Y lloró per primer y penúltima vez naquelles vacaciones. Sentáu nun bancu del aeropuertu, coles llárimes entá apoderándose de los güeyos, buscó na maleta la cartera pa mirar les semeyes qu’había tanto que nun miraba; pero nun taben onde siempre tuvieren. Rebuscó pente l’orde establecíu la tarde anterior pero nun apaecieron. Tuvo a nada de nun pasar el control, de nun llegar al avión. Tardó en decatase de que yera verdá que nunca nada tuviera sentíu.
Pero too cambió cuando Antón pisó aquella pista de baille onde Ana baillaba sola, meneando los cadriles como toles nueches; que siempre acababen faciéndose cuasi eternes. Ana avezaba a acabales na playa o na so casa con cualquier desgraciáu al que-y intentaba quitar tolo que necesitaba, tolo que pudiera.
Antón pasó la primer tarde de vacaciones tiráu na piscina intentando dormir; hasta qu’entamó a sentir el fríu de la tarde y siguió probando suerte tiráu na cama. Pero tampoco lo consiguió.
Ensin saber cuasi por qué duchóse, punxo la meyor ropa que tenía y salió a la cai acompañáu del golor que-y apurríen les gotes que quedaren no más fondo d’un bote de colonia de lo caro.
Na recepción miróse nun espeyu de cuerpu enteru y tardó en reconocese muncho más de lo qu’esperaba. Quiciabes naquel momentu estrincó cuasi dafechu les poques fuerces que-y quedaben, y intentó separtase lo más que pudo de la imaxe que-y reflexaba l’espeyu; quiciabes naquel momentu estrincó les llárimes que tan poques vegaes sintiera correr per sí hasta cuatro meses enantes.
Acabó de cruzar el pasiyu del hotel, la cai y entró naquella pista de baille na que nun había más de tres o cuatro persones bebiendo sentaes enfrente de la barra y Ana intentando baillar al son d’unos ruíos qu’intentaben tener sentíu.
Ana foi lo primero qu’Antón vio namás qu’entró na discoteca. Ensin separtar los güeyos de la moza pidió al camareru un vasín con un poco de jb que nun sabía si diba poder pagar. Metió les manes en bolsu y cuntó les cuatro monedes d’euru y los siete céntimos que-y sobraren del autobús que lu treslladara dende l’aeropuertu hasta cerca del hotel.
Aquel primeru nun foi l’únicu vasu que bebió (desa yá sabiendo, de xuru, que nun lu podía pagar). Quiciabes llegó hasta los ocho… Siempre de pie, moviendo los pies torpemente, colos güeyos llantaos n’Ana (sintiendo, a lo llargo de la nueche, movimientos nel sexu que nun yera a controlar), que nun paraba de movese, d’esperar que llegara más xente, de duldar si cambiar d’espaciu o quedar hasta que se prendieren les lluces y el camareru la llevara hasta casa. Aquella nueche tenía más ganes de metese na cama que de follar, pero lo primero yera lo primero (sobre manera cuando la nueche anterior decatárase, depués de díes d’esperances, de que diba pasar tiempu abondo enantes de que pudiera abandonar aquella vida. Por más que lo intentara aquella nueche nun foi a marcar el teléfonu que-y aseguraba’l futuru).
Ana tardó abondo en decatase de que los güeyos d’Antón taben llantaos nella. Nun-y gustaba muncho, pero atopó nos sos güeyos claros un daqué qu’había cuantayá que nun vía en naide.
Ana nun tardo n’acelerar sensualmente los sos movimientos. Taba segura de que diba averase a él, pero prefirió esperar, xugar cola so presa. Manchó un deu colo poco de polvu blanco que guardaba en bolsu p’algamar les fuerces que necesitaba.
Ana bailló y bailló; Antón miró y miró.
Hasta que les lluces de la discoteca prendiéronse y apagóse la música. Ana nun tardó n’averase a la barra, hasta la presa; pero cuando lo fizo él nun taba onde llevaba tantu tiempu.
Buscólu per tol chigre, pela contornada; pero nun lu atopó.
Aquella nueche de la qu’Ana volvía pa casa col camareru escuchó la hestoria d’un probe home al que la seguridá-y diera una cuera enantes de tiralu a la mar (na parte del cai onde más foles había) por beber abondo ensin tener dineru.