© Suburbia Ediciones S. L. c/Duque de Rivas, 1, 1º D.
Xixón (33204)
Con una ayuda de la
Conseyería de Cultura, Comunicación Social y Turismu del Principáu d'Asturies
Contactu
suburbiaediciones@hotmail.com
Iris Díaz Trancho
L’adoración de los magos
El centru de tola composición pictórica yera ensin dulda’l cofre que sostenía’l primeru de los reis. Ésti, perteneciente a la primer versión del cuadru, diba vistíu con una túnica de finos bordaos de filo d’oru. El neñu, garráu poles manes de María, sosteníase con esfuerzu dientro d’un cuerpu fechu de carne plegao y mórbido; tal y como yera vezu nos personaxes del autor. Nun segundu planu, les figures del restu los reis confundíense nun númberu inesactu, dos, trés, seis quiciabes. Por embargu namás dos portaben cofres de presentes, el rei negru acompañáu por un neñu ánxel del mesmu color y el rei canosu y vieyu, inmensamente cansáu pol viaxe, n’actitú d’espera tranquila y arrogante.
Echando una güeyada al restu’l cuadru, a la parte que Rubens añadió venti años dempués de ser pintáu, descubríense figures de tiempos non correspondientes, forzudos arrastrando caxes y sacos de piedres precioses, camellos vixilantes, caballeros medievales con mayes prietes, antorches prendíes dende’l cielu. Y una sola necesidá de suma cosida a la tela orixinal con intencionalidá perdida.
Helena llevaba dos selmanes trabayando nesi puntu. El pasu de los sieglos llevantare’l cosíu inicial y frayara les capes de pintura nun procesu conocíu como craqueláu. Pa evitar que se desprendieren, la restauradora aplicaba un tipu de cola fecha de grasa d’animal, qu’espardía con procuru y un pincel pela superficie los texíos. Lo mesmo que la piel, la pintura amosaba’l pasu’l tiempu, los repintaos y l'estáu de les coses que l’arrodiaben. El fueu del Alcázar de 1734 dexara una capa de fumu velando los colores iniciales y amurniando’l conxuntu. D’otru llau, el reteláu que’l mesmu muséu encargara facer, tamién camudara l’aspeutu orixinal ya inda la salú de los materiales utilizaos. Por embargu, lo que tenía a tol equipu nuna espera nerviosa, yera’l convencimientu de que’l pintor nun sólo amestara un cachu de tela a la primer pintura, sinón que tamién retocara elementos de los sos propios personaxes y oxetos orixinales. Una capa onde había una mano, o una mirada onde namás yeren a pescanciase unos güeyos.
Helena entemecía’l preparáu de cola pa cubrir les zones delicaes, pronto, bien lo sabía, tendría de llegar al cofre del centru’l cuadru.
La catedral ufiertaba un aspeutu vacíu a eses altures del añu. Frederic esperaba detrás del puestu de souvenirs a que llegara dalgún curiosu, yá non creyente, que tuviera interés por compra-y dalguna d’eses guíes qu’editaren l’añu anterior. Lo mesmo una postal, un rosariu, dalgo que pudiera recorda-y la figura de los reis.
Cuando la necesidá de la presencia d’una reliquia nos templos cristianos yera l’equivalente al prestixu, a la sobrevivencia d’una determinada comunidá o a la venida de fondos pa la construcción d’una ilesia, la llegada a Colonia de los santos güesos nel añu 1164 foi recibida como un sofitu sagráu pal proyeutu de la que sería la catedral más grande enxamás llevantada. Anque tardaría tovía unos cuantos sieglos en ponese’l puntu al templu, aquellos restos yeren, tanto pa la comunidá relixosa como pal restu de la población de la ciudá, un seguru d’esistencia, un apueste necesariu pola fe.
Frederic, exemplu cercanu de la vida venceyada a la creencia, arrodiyábase cada mañana énte la reliquia más grande del cristianismu, el cofre d’oru que yera ensin dulda’l centru de tola composición arquitectónica que formaba la propia catedral de Colonia. Un home énte la estructura complexa y desbordada de la relixón fecha a base d’elementos apuntando al cielu. Milenta demostraciones d’arguyu y poder nes que los reis yeren una reliquia más. Ellos, que yeren representaos como los creadores del preséu material, los portadores d’oru, camudábense agora nel so propiu regalu, nun oxetu pesáu y ostentosamente valiosu. “Entraron na casa; vieron al neñu cola madre María y postráronse a adoralu; dempués abrieron los cofres pa ufiertá-y dones d’oru, inciensu y mirra” dicíen los evanxelios del Nuevu Testamentu, los escritos polos apóstoles. “Entós el neñu ufiérta-yos una piedra en cuenta de los sos dones”, rezaben los otros evanxelios, los Apócrifos de la Infancia, Árabe y Armeniu.
Majid llavaba les manes con agua de lluvia enantes d’entrar nel salón de la llama. Una vez dientro l’espaciu, de forma circular, percorría los suelos de piedra comprobando que too taba onde tenía de tar, la pira nel centru la estancia, les flores de la mañana adornando la base d’ésta y la llama, auténtica razón del ritu, prendida.
Baxo les alpargates sentía’l fríu de la piedra, abriendo bien los pies, l’ún xunta l’otru, nun equilibriu seguru ya intocable. Namás nesi momentu garraba’l pañuelu pa ponelu delantre la boca, sólo entós podía averase unos centímetros al fueu sagráu que tenía de caltener vivu. Él yera’l responsable de que nunca s’apagare aquel Dios que, facía dos mil años, surdiera de la piedra. “El neñu dio-yos a los trés reis una piedra, encamentándo-yos que fueren firmes y constantes na so fe. Los trés tomaron la piedra y tiráronla a un pozu. El rellumu d’un fueu infinitu baxó del cielu y entró nél. Cuando los reis lu vieron garraron el fueu que salía del pozu pa llevalu al so país y ponelu nun guapu templu”. Llevalu y yá más nunca separtase d’él. “En Persia atopé la ciudá de Sava, d’ónde salieron los trés reis cuando fueron a adorar a Xesucristu. Nesta ciudá tán enterraos en trés grandes y magníficos sepulcros”. Y asina ser nomaos pola lleenda de les mas a les fíes y de los homes nel templu, pero tamién polos viaxantes d’otres tierres que, dictao a los poetes, recoyíen les histories como cuentos de fades y degorrios, dende la prosa de la ciencia y la cultura.
Pero Majid vivía nesi pueblu, nesi destín atravesáu pela ruta de la seda que vivía de texer alfombres unviaes a países llonxanos. Vivía amás nuna comunidá pequeña, nuna creencia cuasi qu’escaecida, y como tal baxaba silente a adorar al templu, ensin voces nin glayíos, ensin amosar lo que llevaba dientro.
Cuando salía del salón de la llama, pasaba col mesmo xeitu al salón contiguu, onde descansaben, llabraes sobre’l mesmu tipu de piedra frío, les trés tumbes de los magos.
El cuencu de madera nel que preparaba la grasa taba colocáu enriba les tapes d’un llibru. Sobre tola superficie de la mesa de trabayu había espátules y pinceles, gases llimpies, llápices perfeutamente cachaos, papeles, idees. “Nacíu Xesús en Belem de Xudea, nel tiempu del rei Herodes, unos magos que veníen d’Oriente presentáronse en Xerusalem diciendo: ¿Ónde ta’l rei de los xudíos?”. Y otra vez de cara al cuadru, a esa visión valtiada y personal d’aquella historia que xuntaba tolos mitos acumulaos dende esi primer escritu cristianu. Los alcordaos dende los concilios poles persones con capacidá autoproclamada pa decidir, pero tamién dende los deseos de la xente a la que diba empobinada la creencia.
Los personaxes de la suma, los repintaos pol propiu autor, entamaben a tener sentíu pa Helena. Nun yeren más que parte del conxuntu. El personaxe del guapu caballeru que collabora activamente nel viaxe de los reis, entendíase dende la necesidá del qu’encarga un cuadru y quier ser y sentise reflexáu na más grande de les histories. Los forzudos que nun yeren talos, que yeren yá titanes robaos d’otres fes y otres esplicaciones del mesmu rellatu. Los camellos que golíen a teles y especies, a los cuentos que cuntaben que contó’l comerciante venecianu que, por embargo, falara d’otra cosa. “En Persia atopé la ciudá de Sava”.
Helena dibuxaba nel so cuadernu lo que diba quedando, lo que surdía de la pintura orixinal a midida que llimpiaba’l fumu, el barniz amariello y la intención de tapecer. Fuera’l caballeru, fuera titanes y camellos. Fuera personaxes del séquitu. Fuera corones.
Sobre’l so papel diba surdiendo otra cosa, otra composición que por embargu namás tenía sentíu como apunte, pues nun podía eliminar lo pintao pol propiu autor. Primero foron les luxoses capes, más tarde los rasgos que los facíen diferentes. A lo cabero quedaben solo ellos, solo trés homes de llargues barbes que miraben al neñu con tenrura, “pues él yera’l salvador nacíu de Zaratustra”, pa ufierta-y los sos dones, l’inciensu y la mirra, y pa recoyer el so regalu, el talismán de roca, la piedra de la llama.
Cuando acabó’l trabayu, y el cuadru tuvo tan nuevu como cuando Rubens lu repintara trés sieglos atrás, Helena garró les fueyes copiaes de los llibros escaecíos y xuntóles al so dibuxu. Ellí taba la decisión cabera. La posibilidá d’incluir nel informe de la restauración el so descubrimientu o’l determín de formar parte del secretu.
Coles resines y l'alcohol que-y quedaba sobre la mesa, fizo una pila que prendió pronto nel suelu de piedra del estudiu. Asina quedó unos segundos, mirando pa la llama que Majid adoraba na ciudá de Saveh, no qu’enantes llamaben Persia y agora amenaza. Mirando pa la obra pictórica, un pasu más d’aquella catedral llevantada sobre l’oru y la fe de munchos Fréderic. Ablucada pola grandeza d’esi fueu que baillaba delantre’l cuadru, pero detrás de too.