© Suburbia Ediciones S. L. c/Duque de Rivas, 1, 1º D.
Xixón (33204)
Con una ayuda de la
Conseyería de Cultura, Comunicación Social y Turismu del Principáu d'Asturies
Contactu
suburbiaediciones@hotmail.com
Ignaciu Llope
Cartes d’una presa de la Rote Armee Fraktion na galería de la muerte
(Ulrike Meinhof)
Cabe’l silenciu nesta nueche
cuando na celda permanez
el pasu amodo del olvidu
y seique unos animales
buin xuguetones y perezosos
allalantrones de la piedra duro
de les muries, del alambre
nos que termina’l presente.
Y véome mirar la nueche
y pocu sé d’esi silenciu
que s’apaga na quietú
d’esta celda infinita
y pocu sé yá del misteriu
que se derrouca de la temperatura
d’unos cuerpos rotos
dilíos na violenta revuelta
que’l destín punxo
nun cielu escuru y llonxanu
que nun tomamos por asaltu.
Pocu sé de mí
que nun diga esti silenciu
nuna celda infinita
na qu’una lluz blanco, inmutable
ye l’horizón únicu
nel qu’abico la velea
d’estes nueches que nun son nueches
d’estos díes que nun son díes
atendiendo con vagar
los pasos del verdugu
enllenar de metal la galería.
Son pasos de bronce
son campanes convocando
el son ciertu de la muerte.